Si bo empresa ta na komienso di lansa un kampaña, trese un siman di tremendo baratio, òf simplemente mester subi benta, sigur e pregunta ku ta bini dilanta ta

“Bon, kon nos ta bai hasi’é?”

Koleganan ta haña turno pa bini ku ideanan nobo pa kampaña, òf presentá un plan. Pero realidat por ta, ku tin ora e fase aki ta pega. Ora ku e fecha pa lansa e kampaña ta yega serka, no tin tempu pa sigui tarda riba esaki. Si bo no tin un presupuesto pa paga un kompania pa hasi bo kampaña, akinan 5 pregunta ku por yuda bo ekipo, na komienso di e siguiente kampaña, ku e parti kreativo, “brainstorming”

1. E hende ku nos ke pa bin kumpra, ken e ta i kiko e ta gusta?

Skibi tur e karakteristikanan di e tipo di kliente ku bo ke trese. Kiko e ta gusta? Ki tipo di programa e ta wak na televishon? Kua radio e ta skucha? Ki tipo di aktividat/ wega/ divershon e ta gusta?

2. Kampañanan similar den bo sektor.

Kua kampaña den bo sektor, lokal òf internashonal tabatin ku e mesun tipo di meta òf mesun tipo di kliente? Kiko ta kosnan tin kampañanan similar ku a bai hopi bon pa e kompetensha? Kiko bo por siña di esaki.

Promé ku bo sigui, warda! Akinan nos ta buskando inspirashon, nos no ta bai kopia!

3. Bo kampañan den pasado ku a bai hopi bon.

Kiko tabata e kosnan ku bo kliente a reakshoná bon riba dje? E hende ku ta kumpra, kiko ta e kosnan ku ta ponele bin bèk serka boso?

4. Kiko ta e produktonan/ servisionan ku ta bende mas mihó?

Dikon nan ta bende bon?

5. Kiko ta un ventaha úniko di bo produkto/ servisio òf regalo ku bo por usa, pa motivá un kliente pa kumpra?

6. Importante! Kiko ta e meta ku nos tin?

Kantidat pa bende? Òf kisas djis kantidat di tráfiko nobo di hende ku den futuro por bira kliente? Porta tambe, e meta ta djis pa hasi e nòmber i ekspertisio mas konosí?

Lokual ku bo ke hasi akinan, ta pa bini ku un kampaña ku ta kana a base di un plan, ku tin struktura, i un meta bon klá riba papel. No djis pone deskuento pa loko. Tambe hopi importante, segun ku bo tin bo tremendo baratio òf tremendo kampaña, midi e sifranan di benta i e gastunan. Hopi bia nos ta nota ku no tin manera pa midi e resutadonan di un kampaña. Kon bo por sa si e kampaña a bai bon e ora ei? Si bo kuminsá midi e gastunan di un kampaña i tene bista riba e diferensha ku bo ta mira den benta, bo por kuminsá wak kiko e empresa mester traha riba dje.

Ehèmpel: Kisas bo ta invertí hopi pa atraé mas hende. Pero ora ku e posibel kliente yega na bo Facebook, ken ta subi, kòmbersá kuné i bende algu? Ora ku e yega serka bo ekipo, nan téknika di bende ta yuda bo kampaña?

Tur esakinan mester bini riba mesa ora bo siguiente kampaña ta wòrdu planiá. Repasá e puntonan aki ora bo ta traha bo siguiente plan, i usa esakinan pa midi boso resultado.

Naturalmente, sea pa bo siguiente kampaña, òf pa yuda bo ekipo ku e parti di benta, kòrda ku nos tei pa bo!